政情：蔡志明田二少獲委入鄉局
鄉議局近年力趨年輕化及專業化，陸續提名社會政商界名人及鄉紳二代入局做顧問，近日獲委任嘅就有「玩具大王」蔡志明、自由黨中常委田北辰、自由黨中常委蘇開鵬兒子蘇灝、律師簡松年兒子簡汝謙等。局方尋日又提名民建聯中常委蔣麗芸丈夫梁海明做顧問，但有待民政事務局批准。搵咁多與政黨有關嘅人入局，搞乜呢？
發叔選舉唔撐自由黨
鄉議局主席劉皇發尋日笑笑口話：「鄉議局係聯合國嘛，我哋會向所有人示好！」不過，講到將來最切身嘅選舉問題，局方究竟撐民建聯定係自由黨呢？發叔好肯定咁答話：「梗係幫自己人啦，如果佢（田北辰）對鄉議局有期望，佢就自己諗清楚啦！」問田二少入局幫到乜嘢手，佢就話可以在基建發展及全國人大代表層面幫到鄉議局喎！
發叔尋日又承認接獲私人發展商來信，建議喺大嶼山望東灣興建骨灰龕，計劃中幾萬個龕位大部分會交由政府分配，小部分龕位會撥給鄉議局基金，局方認為計劃正面，故協助發展商推薦予政府。