政情：阿Paul寸公文袋 墮落做爛仔

政改討論變私人恩怨

立法會二○一二年行政長官及立法會產生辦法建議方案小組委員會昨日又開會，不過阿Paul發言時唔係講政改，而係講佢同公民黨嘅恩怨。阿Paul憤言，自己二○○○年參加港島區直選，公布結果時大家都只會戥贏嘅參選人高興，但今次補選凸顯香港文明大倒退，佢話：「佢（白姐姐）有氣量，明知面對暴民都上台，但我哋香港政黨，包括在座嘅政治領袖，不但不阻止會員、黨員做呢啲嘢，反而仲帶頭對輸嘅人百般攻擊、嘲弄！」

阿Paul之後話鋒一轉，將矛頭直指在座嘅公民黨黨魁余若薇，當晚佢都在場。同樣身為律師嘅阿Paul話，自己都係專業出身，過往好尊重公民黨理性討論嘅態度，但覺得依家公民黨「做爛仔，同爛仔一齊」，令人失望；總之句句有骨，寸到爆！

「爛仔」二字即時觸動余若薇嘅神經，佢以規程問題打斷阿Paul嘅發言，冷嘲熱諷話明白阿Paul嘅「親愛的」落選而心存怨憤，要求主持會議嘅小組委員會主席譚耀宗叫阿Paul收回對公民黨嘅侮辱說話。佢又直指阿Paul嘅發言同會議主題冇關，要譚Sir裁決終止對方再大肆批評。二人你一句、我一句，譚Sir根本無從插嘴，最終只提醒各議員唔好互相指摘就拿拿臨宣布會議結束。

其實今日個會議仲有段小插曲。話說個會喺早上八點半開始，要湊夠十個議員先到法定開會人數，但過咗會議開始時間十分鐘，都只得九個議員到場，當中七個係建制派，泛民議員只得民主黨劉慧卿同余若薇，正當大家擔心可能流會之際，經濟動力梁劉柔芬趕至「救會」，否則都唔會出現上述嘅激辯場面。委員會喺今個月廿二、廿五同廿九日會邀請二百三十二個團體就政改發表意見，如果到時班議員仲懶懶閒唔開會，搞到流會就認真失禮囉！