中環耳目：趙樓神1881擺大壽請人唱戲
長實執行董事「趙樓神」趙國雄（Justin）風趣健談，卓妮次次搵佢傾偈實有意外驚喜。早前同佢傾開至愛食肆，佢話鍾意長實旗下「1881」嘅粵菜廳隆濤院，又自爆今年要喺佢哋嘅戶外庭院擺大壽，到時仲會請人搭台唱越劇，重現舊時大戶人家喺自宅大院唱戲嘅氣勢添！
環保唔食魚翅
Justin係江蘇人，佢話：「我哋江蘇人梗要聽越劇，到時喺內地請人落嚟又好，點都要唱吓至得。」佢仲提醒卓妮，佢講嘅唔係阿姐、八和會館主席汪明荃嗰種粵劇噃，而係江浙上海一帶好流行嘅越劇！佢愈講愈投入，笑謂擺大壽至緊要講氣氛、夠級數，佢叫卓妮想像吓，喺隆濤院對出嘅開放式庭院擺十幾圍，啲賓客一時傾吓偈、一時聽吓戲，幾咁開心，又夠晒氣派！
問佢到時要請賓客食咩菜色，佢好牙擦話，喺咁夠級數嘅場合食乜嘢唔重要，不過為咗支持環保，到時唔會食魚翅㗎嘞。
隆濤院係Aqua飲食集團旗下第一間粵菜館，提供懷舊粵式點心小菜，好多城中名人捧場，中總副會長方文雄最鍾意佢哋嘅椰汁燉燕窩。
Aqua老細楊輝強聽Justin話要擺大壽，笑到見牙唔見眼，話個天井喺舊水警總部年代叫「五十信鴿」，依家外牆仲保留咗信鴿嘅小木屋同埋特色廊柱，夠晒氣派！