中環出更（二）：葉劉着Armani套裝撐武漢招商
匯賢智庫立法會議員葉劉淑儀着衫除咗鍾情Max Mara、Sportmax及Paul Smith外，仲有Giorgio Armani，卓妮尋日就見佢一身Armani套裝，再配個鴕鳥皮鞋及手袋，着到咁靚咁高興，莫非因為自己一手栽培嘅南區區議員陳岳鵬（Ronald）成功獲聘為特首辦特別助理？非也！其實佢係去灣仔會展出席武漢新港香港推介會。
度身訂造 價值不菲
葉劉去推介會前，卓妮已經喺立法會停車場先睹為快，欣賞到佢套Armani套裝，一襲淺紫色旗袍式連身裙，配繡上淺紫色花紋嘅米白色外套，就連鴕鳥皮製手袋及皮鞋都係淺紫色，襯到絕！呢一身打扮全部由Armani專人度身訂造，埋單起碼要幾萬元。
記得去年底葉劉曾經同運輸及房屋局局長鄭汝樺撞衫，着埋同款嘅Armani灰色外套，唔知係咪咁所以要度身訂造獨一無二嘅套裝呢？葉劉話，着得咁隆重都係因為早前帶大專生坐高鐵到武漢考察期間，獲當地有關部門及組織殷勤接待，期間認識咗好多朋友，所以武漢來港招商，佢亦禮尚往來着靚啲去撐場。
卓妮