中環出更（一）：莊學山鍾情Clarks鞋40年不變心
時下皮鞋，好睇但未必襟着；一對皮鞋可以着上十年者，恐怕已絕種。英國皇室御用嘅Clarks皮鞋，襟着度十年如一，長實主席李嘉誠表弟、潮州商會永遠名譽會長莊學山，原來係呢個品牌忠實擁躉，四十年前開始代理Clarks皮鞋，尋日喺尖沙咀iSQUARE開多一間旗艦店添。
兩公婆齊做生招牌
來自鐘錶世家嘅莊學山，尋日拉埋太太為旗艦店剪綵。莊太即場揀番對Clarks女裝鞋撐老公，莊學山就着上Clarks黑色綁帶皮鞋，兩公婆齊齊變身店舖生招牌。
莊生同卓妮分享揀鞋心得，話皮鞋最緊要用料靚，着上腳自然舒適無比，Clarks皮鞋就畀到佢呢種感覺，愈着愈軟熟，所以索性代理埋呢個品牌。莊學山同兩個細佬學海及學熹，與友人夾份開咗間港大百貨，為Clarks鞋打開香港及台灣市場，至今喺香港已有九間專門店，而全港賣Clarks鞋嘅鞋舖，就多達五十間，喺台灣亦有逾五十間。
為鞋店剪綵後，莊學山仲有下場，就係趕去撐中總舉辦嘅大學生實習交流計劃。Clarks鞋發揮作用，莊學山由尖沙咀趕去灣仔，腳仔仍未覺攰，抵埗後仲企咗成粒鐘，同班大學生分享營商心得。
身兼中南鐘錶主席嘅佢過兩招畀學生哥話，成功之道最緊要係唔怕蝕底，凡事親力親為，即使細眉細眼嘅工作都要跟到足，正所謂「力不到不為財」。佢慨嘆曾經遇過太錫身嘅工程師員工，對方唔肯落工場，又唔肯掂機器，激到佢紮紮跳。原來做老闆都有氣受。
卓妮