政情：Tim霍買3D大電視睇波
世界盃六月十一日開波，港協暨奧委會主席霍震霆（Timothy）正四出尋找一部六十吋嘅3D電視機，方便同囝囝啟剛及啟山日夜追住電視機睇波。阿Tim話，佢三仔爺都係足球發燒友，所以預咗喺為期一個月嘅世界盃期間，三人肯定會變成熊貓！
依家3D電視啱啱開始發展，未係好普及，但對發燒友嚟講，如果睇世界盃可以有立體效果，都可以填補去唔到現場觀賽嘅不足。Tim都心思思想買部返屋企同兩個囝囝一齊睇，仲預咗到時瞓少幾個鐘漏夜追睇。
之不過阿Tim一開口就要部六十吋嘅，市面上暫時未有噃！我哋聽講某日本知名牌子要到七月中旬先至推出六十吋3D電視機，售價約五萬元，但咁啱推出時間係世界盃開幕之後，睇嚟阿Tim要飲恨嘞！錢銀對Tim嚟講唔係問題，唔知佢有冇牙力，索性落柯打訂製呢？
世界盃開鑼期間，咁啱Tim都要做空中飛人，既要去法國里昂開奧運協調委員會會議，又要去南非開世界足協會議，飛嚟飛去，足足要做成卅幾個鐘空中飛人，都咪話唔辛苦。