佐治希爾幫馬刺再劏牛

【本報綜合報道】馬刺果然係季後賽殺手,尋日憑搶走柏加正選位置嘅佐治希爾轟入29分,主場險勝小牛92比89,總成績領先3比1,大有機會以七號種子身份,踢走西岸「老二」小牛!

一踏入季後賽就大幅「升呢」嘅馬刺,尋日繼續憑整體戰食住小牛,雖然上半場失準稍微落後,但第三節打出壓迫防守,逼得小牛在本節餘下7分多鐘內僅入2分,成為贏波關鍵。兩軍最後一節打得粗野,其中小牛前鋒拿查拉更「箍頸」扯低真路比利落地,被球證以二級惡意犯規罰離場,而尾段小牛有傑特射失三分,最終返魂乏術。

騎士爵士同樣贏多場就掂

馬刺今場輪到年僅23歲嘅控衞佐治希爾爆發,全場16射11中得29分,其中三分球6射5中,命中率高達八成以上!球隊另有四人得分達到雙位數,彌補了鄧肯失準嘅過失。小牛輸波後,總成績落後至1比3,大有可能在近四季季後賽,第三次首圈行人止步。

同日騎士憑「大帝」勒邦占士打出「三雙」37分、12個籃板球及11次助攻,大勝公牛121比98,而爵士亦有布沙貢獻「雙雙」31分及13個籃板球,得以117比106再勝金塊。騎、爵同樣領先3:1,贏多場就晉級次圈。