政情：建制派無大將抬譚耀宗上轎

○五年立法會成立小組會討論政改方案，當時建制派與民主派互鬥「疊馬」，前者有卅四個，後者有廿個，當年仲係前綫嘅劉慧卿仲競逐正、副主席，分別輸畀譚Sir同自由黨楊孝華，戰況激烈。事隔五年啫，竟然完全變咗另一個世界，立法會秘書處尋日公布政改小組委員會名單，建制派減至廿三人，民主派更加剩得八人，街工梁耀忠、民協馮檢基同職工盟李卓人咁，都無報名加入，變相棄守呢條戰線。

民主派放棄發聲權利

據聞民主派眼見同建制派鬥疊馬，都係輸梗格局，索性唔玩，自動放棄發聲權利。建制派嗅到民主派棄械退戰嘅氣味，亦無吹雞「冧友」，小組會嘅組合基本上以現時政制事務委員會為班底，慳水慳力。小組會今日開第一次會議，選舉正、副主席，喺實力懸殊下，呢兩個位幾乎已成建制派囊中物。

港府將政改方案定為最高軍情，政改小組委員會可謂不容有失，即使民主派呈意興闌珊之態，但主席一位，仍然要搵壓得陣嘅人嚟做，難怪雖然譚Sir孭咗三個重要委員會喺身，即政制事務委員會、議事規則委員會同最低工資小組委員會，但仍然要佢啃埋政改小組。其實○八年立法會復會時，譚Sir本來屬意做掌管審批政府開支大權嘅財務委員會主席，但當時港府搵唔到壓得住陣嘅人坐鎮政制事務委員會主席，所以要譚Sir捱義氣，依家情況重演，一句講晒，建制派蜀中無大將。

至於副主席方面，據聞經濟動力林健鋒有意競逐，我哋打電話問民主黨張文光，佢話據過往經驗，譚Sir做主席，絕少請假同遲到，連廁所都好少去，副主席可以主持會議機會唔多，同普通委員無分別，所以民主派未必會爭咁話。即係話，林健鋒好大機會如願。