中環出更：黃宜弘掃國產《柒》牌中山裝
香港政壇中人愈嚟愈鍾意着中山裝，早前卓妮見到立法會議員黃宜弘（Philip）着咗套中山裝，顯得身形弗爆。細問之下，原來係國產《柒》牌，每套只係八百蚊啫！
Philip話有次去上海公幹，同事帶佢行百貨公司，佢哋介紹咗呢個牌子嘅衫畀佢，點知一試好啱身，唔需要改，加上質料同設計都唔錯，價錢相當合理，所以佢一次過掃咗五、六套，仲喺中港幾個屋企都擺定一套，方便出門時帶少啲行李。
Philip見到出席同一場合嘅福建同鄉盧文端，即刻介紹畀老友，原來呢個《柒》牌都係福建品牌。盧生聽完即刻摸摸身上套西裝，勁搞笑話︰「嘩！你八百蚊都咁靚，我呢套要八千蚊，下次都要跟你買先得。」
被老友讚有眼光，Philip都讚番盧生身材好，高高瘦瘦着咩都好睇，自己就一定要大碼先啱身。兩兄弟你讚我一句，我回敬你一句，認真客氣！
其實盧生身上套西裝來頭不小，係近排勁受城中名人追捧嘅意大利名牌CANALI，好似醫管局主席胡定旭、前足總主席康寶駒都係擁躉。