人稱「大口湯」嘅公民黨立法會議員湯家驊，早前又「禍從口出」，喺電台揶揄公民黨嘅所謂「公投」合作對手社民連，最後畀社民連同佢哋班支持者喺網上鬧爆，甚至揚言會對佢不利，佢就聲言唔排除報警處理。「大口湯」日前終於報咗警，不過唔係告發社民連支持者，而係舉報一封來自尼日利亞嘅死亡恐嚇電郵，唔通遠至非洲都有人要搞佢？
「大口湯」尋日自爆，話上周三收到一封英文電郵，內容大致話有人出錢畀發信人殺佢，而且已經跟蹤咗佢一排，知道晒佢嘅行蹤，今次係最後警告；如果「大口湯」唔立即匯一萬五千英鎊到某個戶口，結果就會好似九一一恐怖襲擊一樣喎！
任何有睇開《警訊》嘅市民，都應該理解到呢個電郵純粹想呃錢，偏偏「大口湯」就質疑個電郵咁啱喺政改方案公布當日發出，仲傳咗去好少人知道嘅私人電郵地址，加上之前嘅網上恐嚇疑雲，覺得自己安全受到威脅，於是同其他泛民朋友傾過後，決定報警處理。
港島總區重案組初步調查後，發現呢個電郵由一個喺尼日利亞登記嘅電郵地址發出。其實類似嘅呃錢電郵該國都發生過，記得前高官藍鴻震都被誤傳喺尼日利亞畀人打劫，估唔到連身為資深大律師嘅「大口湯」都信以為真。可能正如佢所講，自己「得罪人多」，先會成日疑神疑鬼、杯弓蛇影。