中環出更：李明逵低碳煮食展廚藝

低碳飲食，除咗食材生產、處理同包裝要低碳排放之外，連運輸都計算在內。咁啱李一哥煮食亦有四大原則︰容易煮、好食、健康同便宜。今次佢示範用櫻桃茄、橄欖同羅勒葉嚟做嘅「櫻桃茄意大利粉」，除咗食材低碳外，又來自近近哋嘅內地，成本只係十零蚊，完全符合晒「見Board」條件，難怪成為李一哥嘅拿手菜啦！

陳繁昌示範科學反應

李一哥媽咪係山東人，所以自小喺媽咪身邊偷師，閒時入廚當減壓。依家退咗休，李一哥致力於青年事務，令佢發現好多年輕人都唔係好識照顧自己，所以佢依家教煮餸，等年輕人學吓獨立。相比起以前揸槍嘅日子，李一哥話依家揸鑊鏟易好多，事關淨係講重量，鑊鏟卻輕巧好多啦！

李明逵（左一）入廚經驗豐富，炒意大利粉絕對無難度，右一為陳繁昌。 （徐家浩攝）

「櫻桃茄意大利粉」色香味俱全，李明逵果然唔係浪得虛名。

不過未經佗鐵訓練嘅陳校長，就覺得支鑊鏟係千斤墜。當年去美國留學先開始學煮食嘅陳校長，連煮飯要落幾多水落飯煲都未識。為咗今次活動，佢好認真咁與同事商量煮咩菜式，事前仲特登試煮過一次。

正所謂熟能生巧，尋日佢示範嘅「青出於藍一定Duck」都算唔錯，鴨肉薄煎配埋藍莓同雕咗科大標誌日晷形狀，寓意學生青出於藍一定得，實際同象徵意義都齊晒，只係個芡稠咗少少，校長自責因為掛住同大家傾偈，搞到個汁煮耐咗。佢仲話煮食同科學有莫大關連，好似個汁煮耐咗，就係科學反應，認真三句不離本行。