中環耳目：許漢忠激讚尚興滷水鵝片
機管局行政總裁許漢忠（Stanley）係潮州人，即使娶咗個台灣靚老婆，屋企有台灣美食歎，但始終有個「潮州胃」，最鍾意去上環皇后大道西嘅「尚興潮州菜館」祭五臟廟，尤其對佢哋嘅滷水鵝片念念不忘。
卓妮早前喺個酒會度撞到Stanley，佢勁讚老字號「尚興」啲嘢夠晒傳統，經常同朋友或家人去開餐，每次去到例必柯打一味招牌滷水鵝片，滷水汁係秘方炮製，鵝片切得厚薄適中，浸過滷水嘅鵝肉嫩滑可口，令人忍不住食唔停口。而滷水鵝雜亦滷得好入味。
卓妮知道好多明星名人都被「尚興」俘虜咗，Stanley亦讚不絕口。雖然「尚興」裝修幾有「懷舊」感覺，Stanley話食正嘢唔使太在意裝修，地方靚唔靚係次要！
「尚興」被老饕們高度評價為香港最好嘅潮州菜館之一，絕非浪得虛名。城中政商名人都鍾意幫襯，好似立法會議員石禮謙就曾經同卓妮勁讚「尚興」嘅白灼螺片冇得頂。