政情：四政黨出招Betty馮扯白旗

康樂及文化事務署早前以東涌公共圖書館即將啟用為由，下令關閉同區嘅逸東邨臨時圖書館，雖然係按舊規矩辦事，不過就引起當區居民嘅強烈不滿，認為當局漠視佢哋嘅需要。當區民意代表罕見地團結，出陰招向康文署署長馮程淑儀（Betty）施緊箍咒。依家嘅政府最怕惡，議員夠惡，政府決定將臨時圖書館轉為永久，費事夜長夢多，搞出風波。

逸東邨一向冇乜社區康樂設施，新建嘅圖書館選址喺東涌嘅私樓附近，距離逸東邨有成三十分鐘嘅路程，如果搭車來回都要十幾蚊，逸東邨內有四分一係綜援家庭，兒童及青少年嘅比例又高，如果連唯一嘅臨時圖書館都閂埋，咪等於逼啲青少年喺區內無聊遊蕩。

民怨升溫，議員當然要為市民出番啖氣，除咗爭到逸東邨兩個區議會議席嘅民建聯同工聯會對事件分外關注，就連同屬新界西嘅民主黨立法會議員李永達（高達）同街工議員梁耀忠都特別留神。

焗官員行路體驗苦況

四個政黨罕有聯手，一齊為居民發聲，新圖書館正名，要喺立法會通過一個指定令，議員煞有介事就指定令成立附屬法例小組委員會，重新審議正名一事，實行以拖字訣延遲逸東邨臨時圖書館嘅遷拆限期。今日仲會由高達擔大旗，帶埋其他三黨代表以及民政事務局政治助理徐英偉同康文署一干人等參觀逸東邨新舊圖書館，特別嘅係唔畀班官員搭車，要佢哋用對腳由逸東邨行到新圖書館來回穿梭，親身體驗吓居民有幾唔方便。

四黨齊心嘅效果有幾大，睇吓Betty立即舉白旗投降就知。事關政府已經同四黨有共識，新圖書館照開幕，舊嘅逸東邨圖書館就轉為社區圖書館，當局仲效率好高咁搵埋接手嘅非政府機構，每個月象徵式收番少少租金，就連舊館嘅書櫃等傢俬都留低唔拎走，希望盡快令社區圖書館可以投入服務。

冇政治意識更加嘥錢

其實逸東邨圖書館每年嘅經費都只係三百萬蚊，如果當局一開始有足夠嘅政治意識，就唔使搞到立法會要成立小組委員會挾Betty上轎，立法會開少幾次會，可能已經慳番圖書館半年經費喇。