政情：林D9搞補選一鑊泡

決定倉卒 衍生灰色地帶

當局上星期先向立法會提交文件，話到明如果現任議員唔使拆街板，佢哋要幫補選候選人做宣傳唔係唔得，之不過就要計番落選舉經費啫。點知話口未完，依家林D9又反口話唔准借街板做選舉廣告，仲話一經發現有人違規，就會連通知都唔出就將有關街板移除。林D9對拆街板嘅態度又係一時一樣，搞到一眾議員無所適從，好似幾個早已拆咗街板嘅建制派議員近日都大罵政府後知後覺，政治觸覺不足，顯示政府喺呢件事上無深思熟慮。

政府今次倉卒下決定，可能衍生出好多灰色地帶，例如議員喺街板寫「支持公投」或者「反對公投」，其實都係變相宣傳；又例如有人存心惡搞，喺街板上貼個號碼扮候選人，混淆視聽，咁又算唔算「在補選中促使或阻礙候選人當選」呢﹖林D9突然間出啲咁嘅通知，除咗令補選亂上加亂外，分分鐘仲會搞到上法庭。

泛民十八個議員日前已經去信選舉管理委員會主席馮驊，反對唔使拆街板嘅安排，泛民議員尋日開完飯盒會，大家一致認為補選愈搞愈亂，計劃再去信馮驊，要求對方交代係咪有鄉事派拒借學校或青年中心作票站；如果確有此事，政府就要盡快通知選民新票站嘅地點同選舉流程。

港府今次迫不得已要搞補選，但係又唔可以將投票率推高，可惜手法唔高明，又舉棋不定，連咁簡單嘅掛街板都搞到一鑊泡，怪不得建制派鬧埋政府一份！