政情:陳淑莊啪貴價養顏丸

公民黨陳淑莊(Tanya)辭去立法會議員個位後,收入大減,人前人後經常呻窮。但講到扮靚,步入「中女」之列嘅佢就話唔慳得。Tanya自爆用闊太至愛嘅Cle de Peau Beaute護膚,又隔日食六十蚊一粒嘅紫雲赤芝補身,開支唔嘢小。

Tanya尋日上電台開咪,被主持人問到何解做極唔殘,秘訣原來係四部曲。Tanya話,最緊要每日瞓足七粒鐘,再善用周六晏晝午睡叉電;最後兩部曲,就係用靚嘢護膚,同埋食補品調理身體。Tanya鍾情日本Shiseido最頂級系列Cle de Peau Beaute,掃齊全線護膚品。

呢個牌子售價不菲,齋買一支保濕乳液都要八舊幾水。佢年前再喺朋友介紹下「啪丸」,服食一粒混和紫芝、雲芝同赤芝成分嘅膠囊,內外夾攻下果然皺紋都唔多條,真係美麗有代價。