政情：葉劉遇汪阿姐變學生
匯賢智庫主席葉劉淑儀係超級戲曲迷，喺啱啱過去嘅農曆新年假，隻身飛去北京兩日欣賞京劇；返到香港，戲癮急速發作，上星期五又去尖沙咀文化中心睇粵劇，入座後發現坐隔籬位嘅女戲迷好眼熟，一望原來係「汪阿姐」汪明荃！咁近城隍廟，葉太即刻求番支好籤，聽汪阿姐即席「授課」。
葉太○六年喺美國史丹福大學修讀文學碩士，又喺東亞研究系進修中國文學，先秦小說、歷代戲曲，一般都難唔倒葉太，但係香港粵曲源遠流長，系統龐繁。葉太話，有大把嘢要跟汪阿姐學。好似上星期五咁，葉太睇嘅曲目係「香花山賀大壽」同「胡不歸」，「胡不歸」大家聽得多，當日由羅家英做小生，但「香花山賀大壽」，淨係個名已經考起唔少人，包括葉太。
葉太話，汪阿姐相當好人，見葉太有啲唔明白，於是即場授課，講解套戲係講觀音娘娘大壽，眾仙家到賀，賣點係功架戲特多云云，聽到葉太連連點頭，獲益良多。