政情：立會新大樓請議員食風
新立法會大樓嘅設計已經出爐多時，尋日一班立法會行政管理委員會成員有機會睇吓新大樓嘅樣辦傢俬同設計模型。議員們浩浩蕩蕩去參觀，好似睇示範單位咁，仲鬧出唔少笑話。
新大樓會議廳入面嘅議員枱櫈，每張枱上都有一部私人嘅電腦，枱上嘅中間位置仲有一個冷氣嘅出風位添，議員可以好似搭巴士咁自行調校風向同風力大小。呢個設計雖然好周到，但一向出名火爆嘅劉慧卿一見到個出風位就好愕然，話唔明點解要吹住啲議員喎。身旁嘅李卓人就好冷靜咁話：「擺明係用嚟吹熄你啲火啦。」李華明亦加把口，話以後邊個議員講嘢聲大夾惡，就要開行個冷氣吹住佢喎。
議員得罪人多稱呼人少，除咗唔滿意風口吹住，對於枱上個人電腦個顯示屏太大亦都有意見，佢哋話顯示屏大容易畀人睇到佢哋開會時一心幾用，畀人睇到佢哋上一啲唔應該上嘅網頁就唔好嘞。有乜辦法？佢哋可以考慮吓專心啲開會，或者索性連議員都唔做囉。