政情:陳茂波張建東齊撐「大笨象」

滙豐控股業績純利遜市場預期,令人大失所望,尋日股價更急挫百分之七至八十元邊緣,雖然前景未明朗,但仍獲好多擁躉默默支持。會計界立法會議員陳茂波(Paul)係其中一個大好友,對俗稱「大笨象」嘅滙豐充滿信心,仲話現時係入貨好時機;佢預期一年後滙豐股價最少有一成以上升幅。

有信心 無緣買

阿Paul今次入貨係繼去年決定滙豐供股後再投下信心一票,佢話滙豐係一間有實力嘅銀行,資產穩健程度全球排第一,加上金融海嘯後滙豐可能有機會收購一啲經唔起考驗嘅銀行,可以令資產更加穩健,唔怪得佢咁有信心啦!身兼滙豐控股非執董嘅行政會議成員張建東(Marvin),同樣對滙豐充滿信心,可惜無緣買到滙豐股票,點解呢?

Marvin話,以前做會計師嘅時候,滙豐係佢公司嘅客戶,所以唔買得滙豐股票,到後來買得,又因工作忙唔記得買;現時做咗滙豐非執董亦都無買,因為賣出買入都要申報及審批,所以到現在都係手持零股。當然投資嘅嘢,都係要自己作決定。