政情：彭清華一箭雙鵰

我哋寫過，去年十二月中建制派飯局改喺民建聯監委會主席楊孫西嘅清水灣大宅舉行，當時中聯辦高層都有赴宴，星期日中聯辦以「回請」為名，喺西環中聯辦大樓頂樓設晚宴，建制派立法會議員基本原班到齊。唔少與會者都話，當晚餸菜屬人民大會堂國宴級，好似湯係墨魚蛋酸辣湯，四道熱菜中有北方煮法嘅四喜金勾翅、鮑片同海參，最令人難忘嘅，係嗰味魚頭煲，話係中聯辦招牌菜，材料平，但工夫多，先為魚頭除骨，再用鰂魚濃湯熬燉，好顯功架。

「溝通不可預設前提」

酒過三巡，觥籌交錯，彭清華發表講話，與會者引述稱，彭講解內地經濟為主，談及香港政改，只寥寥數語，但一針見血表明立場。彭話，最近有議員要求同中央溝通，本來中央贊成溝通，但係溝通唔可以預設前提。

大家應該記得，當日下午，為泛民做「帶信人」嘅全國人大常委范徐麗泰見記者，指對泛民上京唔樂觀，但點到即止，未有言明京官反應。一經拼合，彭清華嘅講話就分外有意思，講出范太所不能講嘅說話，將公仔畫出腸，叫泛民死咗條心，事關喺中央眼中，上京要求終極雙普選，跟公民黨同社民連喺香港搞「公投」爭普選，係殊途同歸，只不過分兩條腿走路，目的一樣，中央唔會上當。

安排泛民上京，等如向泛民送上政治大禮，涉及好多複雜問題，其中一樣係要考慮建制派嘅心理平衡。彭清華當住所有建制派黨派，暗示泛民要求上京觸礁，變相派定心丸，等大家唔使胡思亂想，呷錯乾醋。

不過中央一手硬，一手軟，彭清華透風斬斷泛民上京之路，另一方面，立法會主席就向中聯辦申請，安排全體議員到訪上海同武漢，睇世博同武漢高鐵。建議惹嚟一啲泛民怨言，話公社兩黨五人辭職，唔應該呢個時候北訪。不過，點都好，中央已向泛民顯示願意溝通嘅誠意，但關鍵係「不可預設前提」！