中環出更：王祖安獨愛華製Paul Smith
名人第二代受人注意，往往要做得比父親更出色先至叫有成績，好似身為銀行家之後、大新銀行主席王守業嘅細仔王祖安（Patrick），佢喺美國Boston College讀會計，又攞埋執業會計師牌照，不過畢業後無即刻返香港，反而留喺嗰邊做基金投資。
前日卓妮喺港區全國青聯一個晚宴上見到Patrick，同佢傾開至知，Patrick喺○五年回流香港創業，除咗基金之外，仲做埋地產開發同投資，瓣數多多；又經好友陳仲尼（Rock）介紹加入香港青年聯會，早前浙江省委書記趙洪祝訪港，Patrick都有份獲接見。好多人都會問佢點解唔入爸爸做主席嘅大新銀行，Patrick有自己嘅睇法，話喜歡靠自己嘅專業創業。
工作有自己態度，對於衣着品味，Patrick亦有自己一套。喺美國生活咗十一年嘅佢，反而鍾情英國品牌，事關配合佢嘅身形，Paul Smith就係佢其中一個「飛佛」。Patrick話，依家好多外國品牌，其實都係喺內地製造，所以準確嚟講，佢對中國製造嘅外國品牌更加情有獨鍾，唔使一定要來路貨先啱，難怪喺美國生活咗咁多年嘅佢，都無話崇洋，仲話最愛香港做佢家添。
卓妮