中環出更：政協赴京茅台皮草作伴
第十屆全國政協第三次會議今日喺北京揭幕，一眾港區全國政協委員尋日紛紛上京。名人開兩會唔係首次，但話晒出門近兩星期，心水物品唔漏得。全國政協常委楊孫西抬咗四箱共廿四支金裝茅台；福建幫頭領盧文端帶咗逾萬蚊上等普洱茶葉清腸胃；全國政協委員朱蓮芬揀咗件逾十萬蚊嘅名貴皮草保暖，總之各有所好，各有所需；最勤力係「神經富豪」楊釗，臨上機前仍然埋首簽文件。
尋日「上京團」排到密麻麻，其中數十政協相約坐十二點半飛機赴京，卓妮老友多，梗要貢去送機。楊孫西一向無茅台不歡，估唔到上京不忘帶埋私伙，一運就兩打金裝茅台，每支一斤裝，據聞市價約二、三千蚊，即係帶咗幾萬蚊開會，夠豪氣！
盧文端帶茶餅清腸胃
佢嘅福建幫兄弟、全國政協委員盧文端都唔執輸，帶咗極品廿五年普洱茶餅上京。佢話兩會應酬多，容易腸胃不適，飲普洱有助消滯。呢個秘方將會同一齊上京嘅旅發局主席田北俊分享，都話會送啲靚普洱畀田少分享吓。上京開兩會，應酬特別多，盧文端仲帶定麥皮做早餐，早上清清腸胃。
金城營造集團主席王國強嘅行李包內都有神秘物品，係乜東東？原來係八包中藥，佢話助手知佢感冒，尋日朝早趕去浸大煲咗八包即飲中藥畀佢，上京後加熱就飲得。
班女政協都身懷八寶，朱蓮芬驚北京落雪冷傷風，出動價值逾十萬元名貴皮草傍身，又精選六套新款St.John套裝，開會都繼續靚靚。健康快車創會主席方黃吉雯就着件短袖春裝、手挽新款Chanel手袋上機，叫人眼前一亮！
卓妮