尋日我哋提過建制派有人想組團去搭高鐵，順便邀請埋泛民議員，睇吓有冇機會可以令佢哋同中央關係破冰。負責牽頭嘅旅遊界立法會議員謝偉俊（Paul）坐言起行，尋日已經準備埋參加表格派畀其他議員，就連行程、費用同酒店資料都列埋出嚟，打算復活節長假期拉埋成班議員去坐高鐵同參觀上海世博會場。不過主角泛民就對個旅行團大潑冷水，實行集體請阿Paul食檸檬。
對於呢個急就章旅行團，職工盟議員李卓人就話係「搵嚟搞」，唔相信去一轉旅行就起到啲咩政治作用，民主黨議員涂謹申就話，個旅行團對冇回鄉證嘅議員嚟講好尷尬，因為個團係自費參加，又唔確定係咪入到境，如果到時去唔到就盞搞，所以都係唔諗咁多。公民黨就話要搞補選，所以諗都唔會諗喎！
除咗泛民諗住「冷處理」外，就連建制派都唔係個個支持，阿Paul老友金融界議員詹培忠就話復活節預咗去賭場搏殺，對返大陸零興趣，睇嚟呢個團都唔慌搞得成嘞！