大珠三角商務委員會大換血，政府尋日公布利豐集團主席馮國經連任委員會主席，三十五名委員中，有廿二個新丁，任期兩年，由今年三月一日起生效。委任名單中各大商會、大孖沙、立法會議員同親中社團代表統統有份，實行「分豬肉」唔使本，將公職當人情賣。
大珠三角商務委員會美其名擔任中港兩地政府之間嘅橋樑，所以委員由商界領袖同專業人士組成，不過做出啲乜嘢成績，大家心中有數。今次委員會「換血」過程明顯經政府精心計算，好似全國政協常委兼中華廠商聯合會永遠名譽會長陳永棋退下來，即由廠商會副會長施榮懷頂上；工聯會會長鄭耀棠冇續任，政府就搵咗副會長林淑儀做委員。
另外，同樣以商界、中小企為主要票源嘅自由黨同經濟動力嘅立法會議員方剛同梁劉柔芬都被委任，擺明唔想得失任何人。不過行會召集人梁振英（CY）就冇得留低，原因當然冇講，不過CY唔做，要搵番個行會召集人嘅接班人就難啲嘞。