阿姐話條裙款式好啱佢，夠晒中西合璧，圖案係幅柳樹，甚有中國山水畫嘅效果；仲係旗袍領、七分袖，加埋袖位有少少摺邊，望落好似中式，但卻融合咗西式剪裁，腰間仲有蝴蝶結（小圖）添！阿姐再襯個閃鑽珍珠胸針，清雅中帶貴氣，夠晒乍暖還寒嘅新春。

夏姿喺香港已有四間分店，賭王四太梁安琪、香港海洋公園保育基金主席陳晴都係佢哋嘅捧場客，阿姐都有幾件珍藏，尋日嗰件係今年春裝，盛惠一萬一千九百幾蚊。

阿姐啱啱同老公羅家英由日本仙台度歲返嚟，即刻投入八和會館工作，呢位主席真係唔話得，難怪行會召集人梁振英尋日都有嚟打氣，佢係八和顧問，仲好搞笑講：「支持粵劇，支持八和、支持阿姐！」阿姐聽完笑到見牙唔見眼。

卓妮