本文重點
有「潮州之寶」稱譽嘅國學大師饒宗頤，今年八月邁進人生第九十五個生辰。潮州鄉賢情義濃，尋日趁新春團拜提早向饒老祝壽。饒老預告生日有驚喜，將移師敦煌搞世紀壽宴，城中「潮人」空群而出。本港富豪李嘉誠嘅舅仔、潮州商會永遠名譽會長莊學山將為饒老之行踩線鋪路，會董高佩璇做饒老「護法」，陪佢坐飛機；會長許學之就廣發英雄帖，組織「潮人」見證呢場潮界盛事。
逾百位「潮人」尋日歡聚一堂慶新春，升呢做埋香港潮屬社團總會主席嘅許學之聯同三位副會長陳幼南、周振基及張成雄上台同鄉里拜年。席間話題離不開饒老嘅九十五歲華誕。高佩璇話，「賀壽團」將於八月八日抵達敦煌莫高窟，行程包括展示饒老以敦煌為題嘅一系列書畫作品，主題係「莫高餘馥」，由饒老親自拍板，又邀請中港台學者舉行研究會，當然唔少得最有分量嘅賀壽宴。
饒老心繫敦煌，早喺五十年代已對敦煌出土文物作深入研究，呢次重遊敦煌意義重大。佢拍心口話身體好fit，搭飛機絕無問題。港區人大代表王敏剛都向饒老表心意，喺旗下敦煌酒店預留逾三百房間接待饒老及嘉賓。
藍鴻震停用涉案電郵
團拜會上仲有另一位紅人，就係差啲墮入電郵騙局嘅前民政事務局局長藍鴻震。當年駐日本多年嘅藍爺自爆話，首個致電佢查問事件嘅人，原來係一位相識多年日本朋友。佢又話，除警方調查外，唔排除國際刑警會介入調查；但為免再中招，已停用涉案電郵。
卓妮