生意愈做愈旺嘅亞洲聯合財務（UA）董事總經理長原彰弘，雖然旅居日港幾十年、改埋日本名，但話晒係台灣人，始終不忘家鄉。佢啱啱攜同老婆、囝囝長原京毅（Kyogi）同埋新抱仔返咗台灣過年，兩公婆今日又同朋友去咗賭王四太梁安琪喺江門開嘅高爾夫球場打波，生活充實又健康。
過年前夕卓妮去君悅酒店閣樓自助餐（Tiffin）食晏，撞到佢同Kyogi喺度開餐。原來兩仔爺一星期總有兩日嚟呢度祭五臟廟，因為老婆大人鍾意食中餐，佢哋咪趁開工時食歐陸自助餐，貪呢度菜式花款多，可以各自各精彩。Tiffin中午自助餐每位收費二百八十五元，但係長原係貴賓會員，享有一位免費嘅優惠添！
卓妮見長原彰弘頭盤竟由生果開始，原來佢相信飯前食生果有益啲。佢揀嘅主食五顏六色，睇真啲都係蔬菜為主，肉同埋澱粉質都係點綴啫。至於囝囝就鍾意食牛肉，後生仔始終需要多啲熱量嘛！
Kyogi嘅新婚太太來自台灣望族辜家姻親，舊年請飲時成為城中熱話，佢嘅沙煲兄弟新世界集團第三代傳人鄭志剛都有份去祝賀。
卓妮問佢幾時添丁，Kyogi怕醜咁話順其自然，老竇恨孫恨出面，話一於生隻老虎仔啦！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |