俞師傅話喺今個月八日，有兩個客人去佢辦公室批流年，之後出示咗一個人嘅八字，問可唔可以同佢種生基，幫佢打贏場官司。俞師傅一睇就知個八字係屬於邊個嘅，個客仲講明可以出五倍價錢種一次生基，但俞師傅即刻一口拒絕。

客人好失望，同俞師傅講：「你做呢行，都係為錢啫！」師傅就更加反感，並且同個客講唔係個個風水師都係為錢，就算個客之後話可以畀「同王太（龔如心）同價」，即係成一千萬，呢單生意都唔會接。

俞師傅尋日以「小窮相士」署名，喺報章刊登「一個術數家之心聲」嘅聲明，話「縱然有人出價千萬要本人替某商人種生基，本人已回覆就算給我一億，我亦不會埋沒良心，與全港市民為敵。」佢又勸某商人多做善事補過。師傅無講嗰位客人係邊個，搞到全城都估估吓。