投白票令補選無認受性

由喺立法會玩流會、斬釘截鐵決定唔參加補選、以至喺政制事務委員會通過動議，要求政府修例禁止辭職議員參加補選，建制派議員都有功有架，如有神助。橄欖尋日同傳媒團拜，透露建制派正着手研究點樣將一點五九億元嘅補選經費，從預算案中抽出嚟做修訂，至於下一幕，佢預料將會係一場白票運動，即係話佢哋嘅擁躉就算喺立法會補選投票，亦只會投白票。

一切都跟足劇本，但原來亦有爆肚嘅時候。爆肚情節嘅發生，完全因為橄欖呢位「金牌打手」太心急。事緣喺上個月廿七日嘅立法會大會上，公民黨同社民連兩黨嘅五個議員各人預備咗一篇演辭，原本嘅安排係五人發言後，佢哋嘅辭職至生效，建制派為咗要阻止如此「悲壯」嘅一幕上演，於是寫定流會劇本。

橄欖話，根據劇本，佢要等民記主席譚耀宗起身發言：「我哋離席抗議」，橄欖至要求點算出席議員嘅人數。點知譚耀宗滋油淡定，遲遲都未開聲，眼見第一位發言嘅社民連黃毓民就快講嘢，橄欖情急智生，自行舉手要求索取五個辭職議員嘅發言稿，藉此打斷黃毓民發言。此時譚耀宗才返回劇本，表示要離席抗議，議員悉數離席，橄欖跟番劇本，要求點算出席議員人數，由於不足半數，成功流會。

橄欖仲爆料話，爆肚嘅不單止佢一個，當日有份離場抗議嘅工聯會議員王國興，一邊離場一邊大叫「濫用公帑補選可恥，煽動公投港獨卑鄙」呢幕，都係王國興自行加料，原著並無呢個情節。