新年唔覺意食多咗、食肥咗係好正常嘅事，最緊要係識得做番啲運動燃燒脂肪。黎棟國尋日擔任苗圃行動「行路上廣州」籌款活動嘅開步禮嘉賓，而且冇偷懶行足全程，由沙田中央公園行到去位於馬鞍山嘅香港體育學院，差唔多有一個火車站咁遠，應該可以消耗唔少卡路里。

黎棟國呢幾日嘅賀歲節目非常豐富，初一去睇花車巡遊、初二陪太太去維港睇煙花，雖然好多睇完煙花匯演嘅人，都話太大霧睇唔清楚，不過唔知黎棟國係眼力好定運氣好，自言好清楚咁睇到由煙花砌成嘅虎形圖案。尋日係年初三「赤口」，傳統話當日拜年好易嗌交，不過黎棟國就認為百無禁忌，幫苗圃行動行完大運之後，立即過海同親戚拜年。