Bernard新年前夕以社聯主席身份，到維園年宵市場嘅社企攤位客串賣曲奇，不過由於在場太多記者，開頭好多市民都唔敢走埋去。好彩班職員落力拉客，加上有高大俊朗嘅Bernard做生招牌，人流先慢慢多起來，最後個幾鐘頭做到千幾蚊生意，成績都算唔錯。

返新加坡娘家過年

Bernard家族喺泰國起家，泰國最大嘅盤谷銀行就係佢爺爺陳弼臣創辦，近年陳氏家族仲喺泰國起醫院，口碑甚佳，香港好多政商界名人都幫襯過，包括全國人大常委范徐麗泰及前高官馬時亨。每年大除夕，陳智思一家都會飛過去泰國與上百名家族成員食團年飯，不過由於今次大家夾唔到時間，今年大年初一佢就改咗去太太娘家新加坡拜年。