IT豪話雖然「五散人」睇落鬆散，但其實每個人都各安本分、各展所長。保險界嘅陳健波做嘢出名穩陣同細心，周不時都會幫其他「散人」計吓數，如果有人喺立法會出席率偏低、質詢數目又唔合格嘅時候，就會不停提醒大家要開多啲會同問多啲問題，形同佢哋嘅隱形黨鞭。而一向同官場關係唔錯嘅廠商會林大輝，就專責幫佢哋約官食飯同會面，等其他「四散」代表嘅業界意見，可以迅速直達到政府核心。

會計界陳茂波就係最熟書嘅散人，所有立法會文件都刨到滾瓜爛熟，成為大家嘅活字典。而走在時代尖端嘅IT豪，就理所當然成為「五散人」嘅資訊科技顧問兼傳媒大使，專幫各散人收發最新資訊。醫學界梁家騮就繼續扮演佢嘅「攪局怪醫」角色，不時諗啲怪招刁難政府，仲會免費幫其他「散人」解答吓啲醫學問題，確保大家都健健康康。

憂任期過後此情不再

呢種分工精細得嚟又無迹可尋，如果唔係IT豪講可能都無人留意到。雖然依家唔少人攻擊功能組別出身嘅議員，但「五散人」一於少理，繼續做佢哋認為應做嘅事。IT豪話「五散人」到依家都合作愉快，就連對「散人」呢個稱號都非常滿意，希望呢個狀況可以延續落去。不過佢同時有個擔心，就係四年任期眨吓眼就過，到下一屆立法會選舉後政壇可能又再大執位，到時做官嘅做官，唔選嘅唔選，要再湊齊五個志同道合嘅人，都唔係咁容易！