本文重點
今日係大年初四，卓妮首先恭祝大家喺虎年升官發財、虎虎生威、心想事成！唔知係咪因為今年情人節撞正大年初一，大家都忙於拜年，被迫將情人節嘅浪漫情懷延續到尋日初三，點解咁講？沙田馬場舉行賀年盃，多位平時鮮有一雙一對入場嘅名人，尋日都十指緊扣拖實太太入場，好似立法會「雙波」陳茂波及陳健波、新婚嘅議員涂謹申、以及醫生李國棟等，對對都咁Sweet，赤口實唔會嗌交啦！
陳健波送自己畀老婆
保險界陳健波太太甜絲絲咁同卓妮講，話對老公送嘅情人節禮物非常滿意，呢份禮物百分百係「人心肉造」，就係成個老公陪住佢喎。咁又係，健波做咗議員之後忙到飛起，有時間陪太太自然係最好嘅禮物啦！會計界陳茂波就話年初一同長輩慶祝之餘，都有攬實老婆過情人節，尋日繼續浪漫氣氛，認真甜到漏。至於新婚嘅阿涂，近期經常同太太孖公仔出席活動，但入馬場都係第一次。
平時有影皆雙嘅名人夫婦就繼續一雙一對，好似馬會大董葉澍堃一家、太古（中國）主席陳南祿、港交所主席夏佳理、前立法會秘書長馮載祥一家等。至於另一馬會大董、全國人大常委范徐麗泰就有孝順仔范駿華陪伴，一樣咁甜蜜溫馨。講到新年願望，范太祝願新年人人都過得開心，問佢想唔想抱孫？范太就笑而不語，認真開通。
講番尋日賽事相當刺激，卓妮都睇到熱血沸騰，尤其係莎莎老闆郭少明愛駒「締造美麗」出賽嗰場。「締造美麗」賽前成為頂頭大熱，獨贏賠率一點四倍，即係好大機會拉頭馬，搞到日前飛咗去美國拉斯維加斯度歲嘅郭少明，都急急腳撲機票返港為愛駒打氣。可惜愛駒最後大熱倒灶只跑第三，但郭生好大方話無所謂，已收拾心情返美國繼續同家人過節。
林建康夫婦亦係特登由新加坡趕返香港，為愛駒「勇敢小子」打氣，仲帶埋八歲大仔林孝勇同只得十四個月大嘅細仔林孝正入場，兩個囝囝都係首次入馬場，就可以同爸爸一齊拉頭馬，真係名副其實嘅「運財童子」。
卓妮