唐校長離開香港去美國做學術研究多年，尋日係佢卅年來第一次再戰花巿，所以心情好興奮。細個都有行過花巿嘅校長話，印象中花巿有好多花，不過依家就分開咗乾濕兩貨區。以前喺美國過年氣氛麻麻，依家返嚟香港當然唔同晒，校長話桃花、年糕，仲有佢最愛嘅角仔都有太太打點。今年初一撞正情人節，口密嘅校長話到時或者會有即興節目慶祝，不過就透露太太鍾意玫瑰花，應該會送一紮，睇嚟校長都相當浪漫喎。

講到新年願望，校長話希望學生們學業進步，同事們就工作順利，心想事成，風趣嘅校長仲講笑話如果同事們想加人工都係好願望，事關佢都想。