前排民政事務局局長曾德成喺立法會以無時間為由，拒絕喺Facebook開戶口。尋日佢再被傳媒問起呢件事，佢話最多只能用twitter，事關玩Facebook花好多時間，喺手機上面玩，啲字太細好難睇喎！
twitter係齋用文字溝通而唔會分享圖片嘅交友網站。曾德成話玩twitter可以喺手機上玩，所以可以考慮開戶口，佢咁講頓時令唔少人O嘴。
事關iPhone都可以開啟Facebook啦！原來同樣係iPhone用家嘅曾德成，嫌棄喺iPhone玩Facebook啲字太細，睇得好辛苦喎，仲話民政事務局副局長許曉暉都開咗Facebook啦！總之就係唔肯開。
同場仲有上任無耐嘅民政事務局常秘楊立門，坊間流傳佢同發展局局長林鄭月娥並唔咬弦，佢話喺民政局開心過以前嘅崗位，事關佢又鍾意音樂同藝術，加上以往開親城規會都會好辛苦。答得咁肯定，唔知係唔係變相證實傳聞呢？