前兩日喺中環間酒店遇上香港友好協進會秘書長李祖澤同公關主任盧文端，傾起先知道協進會最近拍板租咗中環廣場一個單位做會址，早前二人仲同會長陳永棋一齊睇過新竇口。新鴻基地產及信和置業係中環廣場大業主，新地董事郭炳湘同信置主席黃志祥都係政協，難怪當日郭炳湘親自帶棋哥佢哋睇樓，仲對協進會作出特優安排，准許使用三樓會所同埋只有大業主先至可以使用嘅全海景私人俱樂部，場地擺到幾十圍酒席，以後協進會搞大型活動，連出去物色場地嘅力氣都慳番。
據聞中環廣場嘅單位以市場租金成交，按現時市況，大約四十幾蚊一呎租，一千呎大概要四萬幾蚊。不過，協進會非富則貴嘅成員大有人在，錢唔成問題。港區全國政協一直想有辦公室，又怕惹嚟兩個權力中心非議，圈子早傳，不如由成員幾乎涵蓋所有港區全國政協嘅友好協進會出手，租個地方，變相做港區政協聚腳點，協進會租到地方，咁即係話，港區政協有新竇口嘞！
講開李祖澤，最近佢攞咗個由國家出版總署舉辦嘅「新中國六十年百名優秀出版人物」獎，係唯一一位出版界人士得獎。盧文端仲順道同佢茶敍慶祝。