07/02/2010

播放本新聞相關短片

政情:陳鎮仁自爆畀老婆鬧

生產力促進局早前畀審計署大鬧亂花公帑、濫發花紅,仲要一年唔見五千幾萬元物資,令人嘩然,立法會政府帳目委員會查完數之後都話對佢哋「極度遺憾」。生產力促進局主席陳鎮仁尋日喺電台節目《香港家書》重提該局行政混亂嘅事,仲自爆老婆睇完審計報告後鬧佢點解管得咁差,不過佢不忘為自己同個局講好說話。

陳鎮仁喺家書中大談歷史,話該局過去幫咗好多細廠變大廠,又幫廠商引入先進科技同轉型,唔係完全無貢獻,仲話喺審計署出咗報告後,已經洗心革面推行「翻天覆地」改革,希望盡快提升管治質素,唔好再惹人詬病。佢又為該局濫發花紅搵理由,話政府只係資助佢哋三成開支,其他都要由員工自己搵錢返嚟,所以用盈餘獎勵員工好合理云云。

埋尾時,陳鎮仁繼續為自己辯護,話當佢解釋件事畀老婆聽,老婆對該局都改觀咗;不過呢幾個理由都解釋唔到佢哋喺蝕錢情況下,點解仲要分花紅,唔知市民又是否接受解釋呢?