陳校長尋日罕有地現身沙田馬場，咪誤會，校長並非爛賭，入場純粹應馬會大董陳南祿邀請食餐飯。講起會否聯同其他大學校長拜會高錕，陳繁昌話未聽聞有呢個安排，不過佢自爆同高錕好有緣，廿年前當佢喺美國加州大學教書時，曾經嚟過香港同中大交流，認識當時任中大校長嘅高錕，兩人仲打咗場網球友誼賽。事隔廿年，陳繁昌都想再遇舊友，唔知高錕仲認唔認得呢位波友呢？

尋日馬場仲有另一位稀客，就係食物及衞生局常秘李淑儀（Sandra），Sandra唔識刨馬，為趁熱鬧，落注買咗馬會大董陳南祿隻愛駒「時時有機」，結果投注有斬獲，隻馬跑第二。至於贏幾多錢，Sandra就唔方便講嘞。