一個五區總辭炸彈搞到成個政圈立立亂，泛民政團幾乎洗牌玩過，有啲搞「公投」，有啲搞聯盟，話就話無牴觸，但實際大家都係但求「河水不犯井水」。由民主黨等十一個泛民政黨及團體組成嘅「終極普選聯盟」，尋日就喺旺角行人專用區搞咗個聯署簽名啟動禮，希望集結市民簽名，逼政府交出普選路線圖，不過民主黨主席何俊仁就唔知點解係咁搭錯線。
何俊仁、民主黨副主席劉慧卿同民協馮檢基等幾個立法會議員尋日都有去為聯盟站台，不過簽名枱前始終無乜人氣；見到群眾反應冷淡，「鐵頭仁」當然要落力叫多幾句口號，不過唔知係咪仲未熟習呢個新組織，「鐵頭仁」竟然將「終極普選聯盟」講錯咗做「終極民主聯盟」，仲唔為意咁一錯再錯，錯咗幾次後，卿姐忍唔住出聲提點，「鐵頭仁」先改口，點知轉頭又講錯做「終極補選聯盟」，同原本想爭取嘅「真普選」完全離題。睇嚟「鐵頭仁」第日再為聯盟站台時，都要好好記熟個名先得嘞！