本文重點
由建制派發起嘅「政制向前走大聯盟」早前喺地區籌集支持政改方案簽名時，喺旺角出現過一幕「市民爭相排隊等簽名」嘅奇景。大聯盟尋日喺灣仔修頓球場外收集市民簽名，煲呔曾竟然聲稱「順路經過」，同政制及內地事務局局長林瑞麟、特首辦主任譚志源等政府官員突然現身撐場，但據聞身為大聯盟召集人嘅工聯會會長鄭耀棠一星期前已經邀請煲呔曾出席，難怪煲呔曾嘅出現冇嚇親大家。
簽完名去看台坐低
不過奇就奇在喺煲呔曾出場之前十分鐘，突然間有愈來愈多市民魚貫入場，排隊簽名，令原本冷冷清清嘅攤位突然熱鬧起嚟。
我哋其後仲發現呢班簽完名嘅市民好有組織地一齊返去修頓球場嘅看台坐低，唔知喺度等啲咩呢。究竟係因為大聯盟嘅號召力大吖，定係有人悉心安排為煲呔曾造勢呢？
我哋問過有份出席簽名活動嘅行政會議成員劉江華，佢就幫呢條投票人龍解圍，話簽名運動向來都係咁，有時得幾丁友，有時有十幾廿人，所以尋日嘅情況冇咩咁奇喎。