女人買嘢講即興，男人都唔執輸，遇上喜歡嘅英國紳士名牌Kent & Curwen，荷包有「食力」嘅冠軍練馬師簡炳墀都即場買番件。「食力簡」鍾情Kent & Curwen有原因，佢話質料舒服到極，多年前連內衣褲都係着呢個牌子。
沙田馬場尋日舉行「Kent & Curwen百週年紀念短途盃賽」，為方便馬迷，大會擺咗個專櫃售賣呢個品牌嘅靚衫，「食力簡」一馬當先貢去
新貨，原來佢屋企閒閒哋有十幾件Kent & Curwen恤衫，粉紅色、白色統統買齊，正所謂好嘢唔嫌多，簡Sir攞起件白色恤衫睇完一輪後，二話不說「科水」一千三百九十元買多一件。
Kent & Curwen係英國皇室御用品牌，貴氣十足。香港奧運代表隊○八年出席京奧開幕禮時，都揀呢個品牌嘅出品做官方制服。簡Sir最欣賞係佢哋嘅棉料恤衫，話用料正，貼身又唔黐肉。佢仲爆咗個小秘密，話十幾年前揀內衣褲時都指定着Kent & Curwen，可惜佢哋呢條線已經無再生產喎。
卓妮