本港發生歷來最嚴重冧樓災難，土瓜灣馬頭圍道一幢樓齡超過五十年嘅舊樓，尋日中午突然全幢倒塌。事發突然，有住客走避不及，造成多人死傷。曾蔭權等官員循例去現場做騷，話會深入調查事故，防止同類事件再發生喎。

講咩！肇事樓宇○四年及最近分別做過檢查，屋宇署仲出埋修葺令添，結果又係冇咗件事，卒之搞到冧樓死人。家陣淨係土瓜灣等舊區就有兩千幾幢呢類「高齡唐樓」，全港條數更襟計，舊樓數以萬計，類似慘劇隨時重演，旨意呢個跛腳鴨政府保護市民安全，不如諗計自保更實際啦。

嗱，功夫茶兩日前啱啱至提醒過各位，鏹魔逍遙法外，空襲警報未除，出街戴鋼盔，擔遮行騎樓底，已經冇鬼用嘞，建議市民扮「獨行俠」，一頂墨西哥闊邊帽另加飄逸披肩，成身包到密密實實，就算中咗鏹水彈都唔使破相毀容吖。

點知事隔兩日，呢條橋又唔係好使得嘞。獨行俠不過係血肉之軀，畀人砌幾拳踢幾腳仲頂得兩下，家陣冧樓咁大鑊，數以噸計磚頭瓦礫兜頭兜面咁責落嚟，分分鐘變「免治獨行俠」，點頂先？所以功夫茶又要建議各位「升呢」，轉用新行頭嘞。呢次巴閉囉，要出到超能力至搞得掂。唔學奇連伊士活，索性換上鐵甲威龍裝，由頭到腳包晒鐵，刀槍不入，飛天遁地，鏹水、鋼筋、石屎，統統冇有怕。掂晒！

嘩，第日香港好玩囉，街上唔係鐵甲威龍，就係無敵金剛；唔係未來戰士，就係幪面超人，直頭變咗個古靈精怪嘅「卡通都市」。不過咪旨意吸引到遊客，事關香港唔係鏹彈就係危樓，通街安全陷阱，係人都怕怕，邊個仲敢嚟呀？

話時話，香港家陣有邊樣嘢安全㗎？食嘢驚走私毒菜，搭車驚亡命飛車，搭驚斷纜，出街驚鏹魔，去公立醫院睇病驚醫生斷錯症，依家連驚爆內地嘅「樓脆脆」都有埋香港版，上演「樓冧冧」，仲搞出人命添。大吉利是講句，好彩豬流感唔係想像中咁犀利啫，如果好似沙士咁勁，靠呢班無能庸官去應付，睇怕死得人多咯。

出街怕中鏹彈，留喺屋企又驚冧樓，唔該港府話畀市民知，香港仲有邊度係安全嘅？禮賓府警衞夠森嚴嘞啩？咪一樣畀班「八十後」攻陷，如入無人之境，喺入面開ＢＢＱ大會，仲周圍Hea，幾乎反轉禮賓府添！

諗落真係得人驚，香港奪命陷阱處處，遲啲唔知又爆乜大鑊嘢，市民睇怕好快又要轉行頭，到時連鐵甲威龍都頂唔住，唔通真係好似嗰套電影咁，變咗「終極毀滅」？