本文重點
牛年將去，自由黨新東支部尋晚食團年飯，支部主席哪吒方國珊做東，前主席田北俊、主席劉健儀（Miriam）、副主席張宇人（Tommy）同方剛、常委田北辰以及久未露面嘅「莎姐」周梁淑怡都嚟捧場，陣容之鼎盛，可謂一時無兩！新春晚宴，方國珊出雞，田少出靚酒，以一支六公升巨支裝英國紅酒（見圖）款客，成為全場焦點，反映田少卸下主席職務，但喺黨內嘅領導地位依然屹立不倒。
田二少自認「70後」
田少支巨裝紅酒，喺英國買返嚟，四百英鎊，即約五、六千蚊港幣，容量相等於八支0.75公升普通裝紅酒。田少親手主持開瓶禮，細心倒落decanter（醒酒器），畀啲酒「出氣」一粒鐘之後，兩個decanter同一個水勺裏面嘅紅酒，好快畀黨友掃光，好多黨友都同Tommy一樣，一到場就試飲咗先，非常捧田少場，都唔知係支酒受歡迎，定係田少特別受黨友愛戴？
自由黨友酒酣耳熱之際，田少上台發言，祝大家虎虎生威，又話諗起弟弟二少，咁啱係虎年出世。今年六十歲嘅二少畀大哥踢爆年齡秘密，即時起身大叫，話係「七十後」，即三十六歲；Tommy忍唔住踢爆二少，話：「你升咗呢，花甲之年嘞！」晚宴播出鬼馬投影片，田少同Miriam被人移花接木，變成滑雪浪人，田少見狀即刻拉Miriam上台擺出溜冰舞姿，相當搞笑，大家叫田少捉住Miriam隻腳掟圈，佢對Miriam話：「三十年前嘅我，一定可以捉住三十年前嘅你嚟掟！」
卓妮