政改諮詢仲有三個星期就完結，身為人肉錄音機嘅政制及內地事務局局長林瑞麟（林D9）繼續播帶，尋日同發展局局長娥姐林鄭月娥行孖必，去建造業界搞嘅閉門政改諮詢論壇，近百名業界人士都畀面出席，不過就唔知係對娥姐有興趣多啲、定係對林D9嘅政改方案有興趣多啲。
論壇一開始，主持人都講笑咁話，知道業界一見到娥姐就會有好多嘢講，叫大家盡量關注政改問題，點知娥姐就乘機食住上，曲線幫政改講好話，指最近已經有千億工程上馬，加上建造業界嘅失業率已經連續八個月下跌，相信個個工人應該都無乜怨言，所以每個人都應該有能力「同心協力、互惠互讓」咁一齊推動政制向前發展。
娥姐呢番言論驟耳聽落都幾合邏輯，不過大家諗深一層就知道，其實依家建造業界嘅失業率係百分之七點四，仍然係咁多個行業中最嚴重嘅，娥姐咁樣「提醒」班工友，唔知會唔會激起佢哋嘅怨氣呢？