心水清嘅朋友應該會記得，《議事規則》規定呢個七人調查委員會要有五個委員出席先夠法定人數，即係如果有三個議員遲到超過十五分鐘，個會就開唔成。調查委員會原本尋日朝早八點半開始，繼續討論調查甘乃威嘅程序問題，不過身為河南省政協常委嘅五散人林大輝請咗假返河南開會，而身兼房委會商業小組委員嘅方剛都話撞正一年得兩次嘅小組會議嚟唔到，即係其他委員要全部到齊個會先至可以開得成。

傳召女事主存分歧

雖然個個委員都知道唔可以遲到，不過有時可能真係天意，另一位五散人陳健波尋日瞓醒就覺得極唔舒服，手軟腳軟，佢自己都心知不妙，第一時間打電話畀委員會主席、經濟動力議員梁劉柔芬（Sophie）「報案」，自己就即刻飛去睇醫生。Sophie眼見流會在即，當機立斷將個會延遲一個鐘，又即刻喪call前黨友方剛返嚟開會，最後先可以避過流會呢劫。

經過兩次會議，委員會其實就程序問題都討論得七七八八，不過就係咪用權力及特權條例傳召女事主嚟作供，委員意見有啲分歧，依家仲未有決定。不過委員會希望下次開會可以解決埋呢類紛爭，喺下個月底正式展開聆訊。

其實調查甘乃威委員會由打算成立一刻已經波折重重，試過差啲湊唔夠人數成立，今次又幾乎流會，相信最開心嘅應該係甘乃威！