尋日下晝喎，北角英皇道模範邨附近再有腐蝕性液體從天而降，濺傷兩名無辜途人，包括一男子一小童。警方當然大為緊張啦，如果再畀鏹魔挑戰權威剃眼眉，好瘀皮啫，所以大批警員嚴陣以待封鎖現場出盡奶力調查。查呀查，查呀查，警方得出一個初步結論：不排除事件純屬意外。

噓，一額汗，原來係意外，咁都冇咁驚。之不過咁喎，功夫茶諗深一層，雖然今次話就話可能係意外，唔好唔記得一個殘酷現實，真真正正嘅擲鏹狂徒仍然逍遙法外，冇人夠膽保證香港係安全嘅。

冇錯，警方曾經捉咗兩個疑犯，涉嫌同銅鑼灣擲鏹傷人案有關，問題係，警方同時懷疑佢哋係有樣學樣嘅模仿犯。換言之，旺角行兇嘅另有其人，廟街行兇嘅唔知乜水，仲未計幾乎無日無之嘅高空擲物。

唉，香港人真命苦，家陣行街街比較保險嘅方法係行騎樓底戴鋼盔，想再保險少少就係唔理好天定落雨照樣擔遮。冇辦法，鬼叫鏹魔橫行無忌咩，又鬼叫警方束手無策咩。

話時話，今時今日嘅差人叔叔都幾搞笑。有一個滿口英文嘅港女，撞車之後拒絕酒精測試不特止，而且一巴掌摑落警員塊臉，清清脆脆啪一聲，勁過幾年前嗰一單新年快樂事件。毫無疑問，港女襲警，搞笑嘅係遇襲警員居然暈陀陀應聲倒地！

嗱，唔知大家點睇，功夫茶就覺得以正常女性一巴掌嘅力度係唔足以將堂堂男子漢一嘢KO嘅，呢度有兩個可能性，一係插水扮嘢，一係體質太弱。如果係扮嘢，最多返去惡補演技，如果係體質太弱，咁先至大劑。喂，全香港七百萬市民等住你去保護o架，摑一巴就話倒地，憑乜嘢捉鏹魔呀！

即係咁，由於警方捉鏹魔依然處於甩拖狀態，而且有理由相信好多警務人員過分嬌生慣養唔係幾捱得皮肉之苦，所以功夫茶為大家介紹一套最型仔嘅保護裝束。記唔記得奇連伊士活嘅經典服飾？冇錯嘞，就係一身獨行俠打扮，戴一頂墨西哥闊邊帽，加上飄逸披肩，基本精神係將自己由頭包到腳。當然啦，唔好學獨行俠帶槍出街，差人唔識捉鏹魔啫，識得捉你o架。

有人可能會話，香港遲早變鏹水港，其實可以講得好聽少少，香港遲早變獨行俠港，因為通街都係包到密密實實嘅奇連伊士活。

如果你嫌獨行俠裝束太焗，咁就冇辦法嘞，惟有祝你好運。不過行街街不設防都有一個好處嘅，方便出外旅行表露身份吖嘛，極之容易辨認你係香港人，外國朋友一見到你手手腳腳頭頭面面都係鏹水灼過嘅傷痕，自必恍然大悟講一句：Oh, You Are From Hong Kong!

有時候，功夫茶都想學港女狠狠地一巴摑醒警方，然後對住佢哋耳仔邊大聲咁講：唔好再甩拖，快啲捉鏹魔，否則香港想唔死都難！