高鐵餘波沒完沒了，除咗有市民要求當局跟進兩星期前十九個建制派立法會議員搭霸王車外，連當晚被困嘅議員都要秋後算帳，當中包括「逃走」時被人用水樽掟中嘅「ＩＱ博士」黃宜弘。話說尋日立法會保安事務委員會開特別會議，原本係警方交代○九年治安情況，但身為委員嘅ＩＱ博士就借機向警隊一哥鄧竟成投訴，話依家班八十後嘅示威行動愈演愈烈，好似之前反高鐵示威咁，又衝擊警方防線，又向議員掟嘢，質問到底班八十後嘅行為係咪違法，當局又可以點跟進。
點知一哥全程背書，話警方會尊重市民嘅言論自由；至於係咪違法，一哥就無正面回應，只係話有證據嘅話，一定會交畀律政司跟進。一哥嘅答案當然無辦法令ＩＱ博士滿意，於是當社民連黃毓民喺立法會大會提出關於元旦大遊行嘅質詢，ＩＱ博士又提出申訴，內容同保安事務委員會嘅提問幾乎一樣，只係眾目睽睽下，佢無提到有人掟樽呢件「瘀事」。可惜答問題嘅保安局局長李少光只係重複話當局當日已用最容忍態度對一班示威者，仲話警方當日嘅做法抵讚添！講嚟講去都係嗰三幅被。