政改諮詢方案，成敗勝負，本來應該由特區政府同民主派埋身肉搏，一決雌雄，但係最新發展，變成港府以外嘅建制派逐漸主導大戰，同民主派迎頭對撼，煲呔曾霎時間由主角淪為只有靠邊站嘅阿四角色，論搶鏡曝光，數到白姐姐白韻琴，都未輪到佢；講白啲，即係連大配角都無得佢做。

議員編導演 港府得個睇字

煲呔曾喺呢場政改博弈遊戲中被邊緣化，早見端倪。日前立法會建制派喺中總召開武林大會，港府政改主將、政制及內地事務局局長林瑞麟做座上客，就大出口術呼籲各黨派參與五區補選，反映港府好想建制派政黨全面動員搶位，為政改方案攞多一、兩張支持票。但係結局令港府失望，繼自由黨宣布不參選後，民建聯同工聯會亦極有可能杯葛補選，可見港府喺今次「公投」大戰上，已經失去話事權。

再者，尋日立法會流會一幕，建制派議員全程自編自導自演，港府得個睇字，嚟緊否決補選撥款一役，港府更加無置喙之處，不論結局係建制派拚死去盡，否決撥款，定係虛張聲勢，臨陣煞車，主動權都掌握喺一班建制派議員手上，港府可以收檔收工。總之，喺今次「公投」大戰，港府被一步一步逼出戰圈，阿Ｑ啲諗，係翹埋雙手乜都唔使做，但實情就係權力旁落，想做都無得做。

煲呔曾淪為閒角，換咗角度，都未必係壞事，佢以後可以日日入元朗歎奶茶王、去西環坤記菜館食煲仔飯囉。再唔係，得閒就留番喺禮賓府餵佢嗰幾條心愛錦鯉，或者打電話畀因為帶朋友玩轉禮賓府而正在休假待查嘅好客家丁，約齊成班「80後」喺禮賓府攞正牌開ＢＢＱ大會，燒羊架、煎蝦碌，歡迎其他家務員攜同親友出席，與民同樂，以另類方式做好呢份工。