本文重點
貴州茅台近年升值遠超紅酒，一支珍藏五十年嘅茅台佳釀，身價較去年攀升四成多，叫價高達三萬三千幾蚊，媲美一支1982年法國Lafite。香港廠商聯合會副會長、茅台之友會秘書長吳永嘉（Jimmy）自創一招茅台「升呢」法，將滋陰補腎嘅冬蟲草加入五十年茅台浸釀，據聞有養顏保青春效用。
茅台清洗蟲草
上等茅台買少見少，Jimmy話，五十年茅台已是千金難求，唔少富豪有酒亦唔捨得飲。為嘗盡每滴酒香，茅台圈中流傳一種刁鑽飲法。飲家先買嚟十條上等冬蟲草，放入五十年茅台入面浸半年，不過浸之前要清洗，清洗蟲草仲好講究，千祈咪用水洗，否則水氣會破壞茅台酒味，最好搵一支五年茅台嚟清洗蟲草就最正宗。
呢種配搭有乜神奇效果？Jimmy話，蟲草味道不太濃，混和茅台後有助提升酒香，但配上人參則不太合適，因為人參味道太濃烈喎，佢話盛傳咁飲法，可以養顏保青春，真係信唔信由你！不過好多人等唔及半年就已經飲晒。
講到飲茅台，Jimmy自爆可以一口氣飲四十幾杯，佢話年份珍藏愈久嘅茅台唔易上腦，舉杯盡興都無妨。收藏茅台有學問，最好將樽身包上保鮮紙，可保酒量不易揮發。