涉嫌襲警被捕嘅陳巧文，懶理有官非喺身，前晚六點幾以「雞冠頭」、Smoky eyes及超低腰褲形象，獨自逛中環ifc輕鬆吓。咪以為陳小姐齋睇無幫襯，卓妮見佢一個箭步走入正在割價傾銷嘅ZARA時裝店，睇見減價冷衫及大褸就嗒晒糖，試咗廿分鐘後扑錘買咗件黑白色格仔褸，盛惠四百九十九蚊。

放大圖片	陳巧文喺ZARA減價貨架前細心挑選，愈揀愈興奮。	購物完畢，陳巧文急急腳轉搭「叮叮」落銅鑼灣。

縮入店舖避記者

執到平貨嘅陳巧文急不及待「示威」，將原本件白色中褸塞入膠袋，然後着住新衫步出門口，點知行唔夠兩步，突然引嚟成棚記者追住佢影相，平日連差佬都唔怕嘅陳小姐嚇到花容失色，縮番入店內躲避，可惜售貨員未施以援手，由得佢一個人「罰企」，陳小姐見避無可避，抖順條氣後施施然步出。

唔知陳巧文係咪被鏡頭嚇親，對所有提問封嘴唔回應，同早前衝擊立法會嗌到聲嘶力竭嘅舉動大相逕庭，仲大頭蝦到連新褸上仍然吊住個價錢牌都唔知，唔通咁先叫型？

畀人追住嘅陳巧文唔理咁多，行去電車站搭兩蚊「叮叮」去銅鑼灣，貫徹慳家本色！

卓妮