在銅鑼灣上班的楊先生，每日午膳均取道堅拿道天橋行人過路處，早前發現近時代廣場通道兩旁的行人路，設置長約五、六米的欄杆，令原本「全線不設欄杆」的過路處收窄為只剩三、四米的「樽頸」位，「運輸署做之前有冇諗過㗎，依家搞到啲人逼埋一齊過馬路，欄杆就畀人泊晒車仔！」楊指每逢上下班時段，不少市民會取道上址前往橋底乘搭隧道巴士，人流更見擠擁，每有巴士駛經更見險象環生。

商戶得益 擺賣泊滿車仔

楊先生又發現，在運輸署的改善工程中，最大得益者並非市民，而是附近商戶，「起個欄杆就畀人哋泊搵食車仔，整闊條路就畀啲舖頭擺晒出嚟賣嘢，有邊啲係為市民做？」楊指加闊行人路工程後，商戶違法擺賣情況愈趨嚴重，卻鮮見部門執法，促相關部門正視問題。

「運輸署起欄杆之前根本就冇諮詢過區議會，話起就起，我都係收到市民投訴先知加咗欄杆！」當區區議員鍾嘉敏炮轟運輸署「自把自為」，並製造擾民問題。鍾指上址商場、戲院及店舖林立，行人眾多，在行人過路處加設欄杆後令行人更為不便。鍾又說，「整闊條行人路本來想防止車輛高速駛過，保護市民，但依家啲人逼晒出馬路行，結果仲衰過以前！」鍾指接獲市民投訴後曾作反映，惜一直「冇反應」，不滿該署漠視民意。

議員狠批處事敷衍擾民

「運輸署冇理由唔諮詢區議會就去馬，冇作用嘅嘢起嚟有乜用？」立法會民政事務委員會委員王國興狠批運輸署處事敷衍，進行工程前未作實地考察及諮詢民意，令利民工程變成擾民措施，要求該署應即時改善。

運輸署發言人表示，早前接獲市民投訴，指在上址過路時，視線會受駛至巴士所阻，遂將原有行人過路處向南移至現時位置。接獲本報轉介後，發現行人在改善工程後傾向集中於近軒尼詩道一段過路，已即時將過路處再擴闊兩米，令整個過路處增至約六米。至於商戶霸佔行人路問題，則已交由警方及食物環境衞生署跟進。